النزلات المعوية - Gastroenteritis

النزلات المعوية - Gastroenteritis

النزلة المعوية هي إصابة الطفل بنوبات متكررة من الإسهال و القيء و أسبابها كتير ممكن يبقى سببها

(فيروسي - بكتيري - طفيليات)

فيروس الروتا هو أشهر سبب للنزلات المعوية في الأطفال اللي بتوصل للجفاف الشديد و بتحتاج دخول المستشفى والمحاليل الوريدية

لحسن الحظ في تطعيم ( اختياري) لفيروس الروتا ممكن ياخده الطفل ، جرعتين عند شهرين و أربع شهور

التطعيم مش بيمنع الإصابة بفيروس الروتا ، لكن أهميته أنه بيقلل شدة النزلة المعوية و احتمالية الدخول في جفاف شديد

السالمونيلا و إي كولاي و الكامبيلوباكتر من أشهر أنواع البكتريا اللي بتسبب النزلات المعوية ، وفي الغالب مع الإسهال و القيء بيبقى مصحوب بارتفاع شديد في درجة الحرارة و دم في البراز و إعياء.

طفيلي (الجيارديا)  و الأميبا من أشهر الطفيليات المسببة للنزلة المعوية

ازاي نعرف إن النزلة المعوية بدأت تدخل الطفل في جفاف ؟!

هنلاحظ جفاف لسان الطفل وحلقه ، مفيش دموع مع البكاء ، جفاف الجلد

ومع زيادة درجة الجفاف : بتقل كمية البول و بيزيد بكاء الطفل وعينه بتبقى غائرة

علامات الخطر و الجفاف الشديد : برودة الأطراف ، غياب الوعي .

النزلات المعوية على الرغم إنها لو اتشخصت بدري و الطفل أخد علاجه الصحيح في الوقت المناسب بيتم الشفاء منها من غير أخطار

إلا أن مضاعفات تأخر العلاج زي الجفاف الشديد بتبقى خطر جدًا وممكن توصل

للوفاة نتيجة حموضة الدم أو التغير في أملاح الصوديوم و البوتاسيوم في الدم .

عشان كدة أول ما الطفل تجيله نزلة معوية لازم يتم فحصه بواسطة طبيب الأطفال عشان نتطمن إن مافيش جفاف   

          المضادات الحيوية مش هي العلاج الرئيسي للنزلات المعوية ، هي علاج تكميلي في حالات النزلات المعوية نتيجة التهاب بكتيري

أهم علاج للنزلة المعوية هي ( السوائل )

الطفل بيبفقد سوائل  وأملاح جسمه في الإسهال و القيء و بالتالي الحل المنطقي هو تعويضه بالسوائل المناسبة عشان ما يدخلش في جفاف

منظمة الصحة العالمية قدرت توصل لفكرة بسيطة وهي أكياس معالجة الجفاف دي بتتكون من تركيزات معينة من الجلوكوز و الصوديوم و البوتاسيوم

الكيس بيتحل علي 200 سم ماء نظيف ( مياة معدنية أو ماء مغلي و مبرد)

وبياخدها الطفل بالمعلقة الصغيرة أو السرنجة بالفم بكمية يحددها طبيب الأطفال حسب وزن الطفل على مدار 4 ساعات

وبكدة بنبقى عوضنا الطفل بالأملاح و السوائل اللي بيفقدها و تأثيرها مساوِ لتأثير المحاليل الوريدية

الدراسات أثبتت إن في دور كبير لل( الزنك) في علاج النزلات المعوية

ولو الطفل أخد من 10 ميللجرام ل 20 ميلليجرام في اليوم لمدة 14 يوم بيساعد في الشفاء من النزلة المعوية 

الأدوية اللي بتمنع الإسهال و بتقلل حركة الأمعاء مش مثبت إن ليها دور في علاج النزلات المعوية و أحيانا بتعمل مشاكل و مضاعفات

لإن الاسهال  طريقة الجسم الطبيعية عشان يتخلص من السموم اللي سببت النزلة ،المعوية ، و بالتالي لما بنمنع الإسهال بتفضل السموم متراكمة في الجسم

موانع القيء دورها بيبقي السماح للطفل أنه ياخد محلول معالجة الجفاف بالفم

أكياس معالجة الجفاف لازم تتحل في 200 سم ماء مش أقل من كدة عشان مايزيدش تركيز الصوديوم في دم و دي حالة خطيرة جدًا

يبقى كدة

علاج النزلة المعوية والجفاف البسيط (أكياس معالجة الجفاف عن طريق الفم ) و شراب الزنك

لكن الجفاف المتوسط و الشديد علاجهم الحجزفي المستشفى و المحاليل الوريدية 

طبيب الأطفال المتخصص هو اللي هيحدد بفحص الطفل درجة الجفاف  والعلاج المناسب .

الرضاعة الطبيعية - الجزء الثالث

اللبن الصناعي مش أكتر من بديل للبن الأم ، يعني الأساس الرضاعة الطبيعية

شركات الأدوية و الأغذية أنتجوا الألبان الصناعية كبديل للبن الأم في حالة مشكلة صحية عند الأم تمنعها من الرضاعة

 زي

إصابة الأم بفيروس التهاب الكبدي الوبائي (B )

الأم اللي بتاخد علاج كيماوي للأورام

الأم المصابة ب قرح هربس نشطة في الثدي

active herpes simplex virus lesion

الأم المصابة بالدرن بتمنع الرضاعة لغاية ما تخلص أسبوعين من العلاج الخاص بالدرن

الأم المصابة بفيروس التهاب الكبدي الوبائي

 (C)

تقدر ترضع عادي

 أو

لو في مشكلة صحية عند الطفل  ( زي ال
galactosemia , PKU)

أو

كمكمل في حالات نقص كمية لبن الأم  عشان ما نعرضش الطفل لمخاطر الجفاف و نقص التغذية

شركات الأدوية حاولوا انهم يوصلوا لتركيب يقرب من  لبن الأم في كمية البروتين و الكربوهيدرات و الدهون لكن طبعا مقدروش يوصلوا للتركيب المشابه ١٠٠٪ ، لأن لبن الأم فيه مركبات بتبني مناعة الطفل ضد الأمراض و مركبات بتساهم في نمو الجهاز العصبي و تطوره .

لبن الأم فيه

secretory IgA

وده نوع من الأجسام المضادة المناعية بيدي مناعة للطفل ضد الميكروبات

في معلومة عظيمة : أثناء الرضاعة ، الطفل بيدخل جزء من اللعاب في ثدي الأم ، عملية أسمها backwash

، الجهاز المناعي للأم بيتعرف على الميكروبات الموجودة عند الطفل و بيفرز أجسام مضادة متخصصة في النوع ده من الميكروبات و بالتالي ممكن نعتبر الرضاعة انها

sensor

مناعي

للطفل ، بيعمل

adjustment

لتركيب اللبن حسب حالة الطفل

 أول لبن بينتج بعد الولادة بيبقى كميته قليلة لكن بيحتوي على كمية كبيرة جدا من الأجسام المناعية اللي بتحمي الطفل من أمراض كتير

نضيف على كل ده أن في دور وقائي للرضاعة الطبيعية في أمراض زي الإسهال ، التهاب الأذن   ،

الحساسية  ،  مرض السكر النوع الأول .

لبن الأم فيه الأحماض الدهنية الأساسية اللازمة لنمو و تطور الجهاز العصبي و ده مهم جدا للنمو العقلي للطفل .

بالنسبة للأم اللي بتشتغل و هتغيب فترات عن الطفل فترات طويلة ، مش هتحتاج تدخل اللبن الصناعي و تقدر تستمر في الرضاعة الطبيعية عن طريق ال expressed breast milk

انها تجمع لبن الأم عن طريق المضخات الخاصة و  دي منها أنواع يدوية و أنواع كهربية و هي الأفضل عشان بتوفر الوقت و المجهود و بتقدر تضخ كميات أكبر في وقت أقل .

تقدر الأم تحفظ اللبن و تخزنه في عبوات زجاجية أو بلاستيكية و في أكياس معقمة مخصصة لحفظ لبن الأم و هي اكتر طريقة حفظ مضمونة و عملية

ممكن بعده يتم تخزينها في الفريزر لمدة ٦ شهور أو في الثلاجة لمدة ٤٨ ساعة 

بعد ما يخرج من الثلاجة أو الفريزر بيتم تدفئته تحت مياه جارية

بس لازم الأم تخلي بالها إن اللبن بعد خروجه من الثلاجة أو الفريزر و تحوله للصورة السائلة  يتم استخدامه في خلال ٢٤ ساعة بعدين نتخلص منه .

وطبعا ممنوع تعريضه لدرجة حرارة عالية زي (الميكروويف) !

الرضاعة الطبيعية أحسن اختيار لطفلك و هتفرق في حياته الجاية جسديا و نفسيا .

اختاري صح ! :)

الرضاعة الطبيعية - الجزء الثاني

عملية الرضاعة عملية متبادلة بين الرضيع و الأم بمعنى إن كل ما امسك الرضيع بثدي الأم و ابتدي عملية الرضاعة ، هيزيد إفراز اللبن و مع المرات المتتالية هتزيد أكتر و هينتظم الإفراز و بالتالي

هنوصل للهدف : رضاعة طبيعية منتظمة !

قولا واحدا ، مفيش حاجة اسمها أعشاب أو جلوكوز نديه لمولود !

الطفل المولود قدامه خيارين من (اللبن) : 

لبن الأم

أو

اللبن الصناعي رقم ١ ( في حالة الضرورة الطبية القصوى ! )

ليه لبن الأم مهم جداً ؟!

الأكاديمية الأمريكية لطب الأطفال و منظمة الصحة العالمية وضعوا إرشادات واضحة على ضرورة الرضاعة الطبيعية بصورة مطلقة

 (exclusive breast feeding )

في أول ٦ شهور من حياة المولود

لأن بعد دراسات وجدوا إن في فوائد كتيرة للبن الأم مش موجودة في أي منتج من الألبان الصناعية .

ليه ماينفعش ندي الطفل جلوكوز أو أعشاب أو ماء ؟!

لأن الطفل المولود بيحتاج كمية كبيرة من الطاقة و كميات محددة من العناصر الغذائية و الأملاح و المعادن كافية إنها تواكب نموه السريع جدا

أي سوائل هياخدها الطفل المولود غير اللبن هتمنعه إنه يرضع لبن الأم ، و مش هتديله العناصر الغذائية اللي محتاجها بالإضافة إنها ممكن تغير تركيز الأملاح في الدم و تعمل مشاكل زي

 نقص الصوديوم

Hyponatremia،

  غير إن أعضاء الجسم بتكون غير ناضجة بالشكل الكافي فبيبقى صعب التخلص من بعض المركبات الموجودة في الأعشاب و عشان كدة لازم نبقى حريصين جدا في أي حاجة بنديها لحديث الولادة

الرضاعة الطبيعية - الجزء الأول

الرضاعة الطبيعية

في قناعة عندي إن كل ما هو طبيعي وما اتعرضش لعوامل التصنيع و تغيير التركيب processing ، فهو مفيد جدا طالما بيتم تناوله بصورة صحيحة و بكميات معتدلة . لبن الأم أكبر دليل على كدة .

الكلام عن الرضاعة الطبيعية كتير و هانزله في صورة سلسلة على أجزاء هيكتب الجزء الخاص بزيادة لبن الأم متخصصين في الرضاعة الطبيعية .

 هاتكلم في مقال النهاردة عن بعض من فوائد لبن الأم  و شوية ارشادات بسيطة ، تساعد في بدء الرضاعة بعد الولادة .

بعد الولادة و أول ما بيتطمن طبيب حديثي الولادة و الأطفال على المولود بتبقى أول نصائحه للأم إنها تشيل المولود و تلامسه skin to skin contact

و تبدأ ترضعه طبيعي .

و بيكون رد أقارب الأم و الأب من السيدات :D

يعني مش هتكتبلنا على أعشاب ؟!!

مش هنديلة شوية جلوكوز ؟!! 

الأم مش فايقة و مش هتقدر ترضعه !

مش بينزل لبن كافي ، مش هيشبع !

الردود دي بيتم تكرارها بصورة كبيرة جدا .

المعلومة اللي بتكون غائبة عن أهلنا ، إن كمية اللبن اللازمة لإشباع المولود أول يوم بتكون قليلة جدا  ، لكن اصرارنا على الرضاعة الطبيعية أول يوم بيتوقف عليه مسار الرضاعة الطبيعية في كل الشهور اللي بعد كدة

حساسية الألبان - الجزء الثاني

اتكلمنا في الجزء الأول من الموضوع عن

أعراض حساسية الألبان و بعض الفحوصات اللي بتطلب

في الجزء الثاني هنتكلم عن أيه أهم تدخل بنشخص بيه حساسية الألبان ، و هي النظام الغذائي

و المقصود بالنظام الغذائي هو أن الطفل اللي بيرضع لبن صناعي هنستخدم ألبان مخصوصة زي
extensively hydrolysed formula

و دي بتبقى ألبان مصنعة بطريقة خاصة بيتم فيها تكسير البروتين الموجود في اللبن عشان ما يسببش الحساسية

أو

amino acids formula

و دي ألبان من الأحماض الامينية

أكتر شيء مزعج في الأنواع دي أن سعرها غالي و طعمها سيء فبتبقى مزعجة جدا للطفل

أو

soy based formula

و دي مصنعة من الصويا ، و لا ينصح بيها في الأطفال أقل من ٦ شهور .

بالنسبة للطفل اللي بيرضع طبيعي ، الأم هي اللي بتبدأ تتبع نظام غذائي من أسبوعين ل ٤ أسابيع ، بيتم فيه منع الألبان و منتجاتها و أي نوع أكل فيه منتجات ألبان و وده بيشمل :

الأجبان و الزبدة و القشطة و

أي حلويات فيها منتجات ألبان  ،

أكل الاطفال زي طحين حبوب القمح و الارز و غيرها حتى لو مش مكتوب انها بتحتوي على اللبن بيتم منعها لأن خطوط الإنتاج بتحتوي على أثار اللبن ، حتى لو مش مكتوب في مكوناتها

الشيكولاتة بأنواعها فيها لبن ، إلا ال dark chocolate و لازم نتأكد أن مش مكتوب في محتوياتها أثار اللبن

معظم المخبوزات الأفرنجية زي الفينو فيها أثار لبن و الخبز الأسمر مسموح بيه .

بعض الأطباء بيوصوا بمنع اللحوم الحيوانية باعتبار أنها ممكن تسبب اختلاط مناعي cross reactivity
 مع بروتين اللبن ، يعني الجسم هيهاجمها كأنها بروتين اللبن

طبعا الموضوع صعب جدا و مجهد نفسيا و بدنيا للأم و الطفل ، بس لازم يتم المنع بصورة دقيقة عشان نقدر بعد مرور من ٢ ل ٤ أسابيع نحدد هل الأعراض بدأت تتحسن فعلا و لا مافيش تغير ، لو بدأت تتحسن يبقى كدة ممكن فعلا التشخيص حساسية الألبان و لزيادة التأكيد الأم هتبدأ تأكل منتجات الالبان لمدة أسبوع و بنشوف هتبدي الاعراض تظهر تاني و لا لأ

ساعتها بالإضافة للتحاليل اللي قلنا عليها  ، بنقول إن الطفل عنده حساسية ألبان و نبدأ نمنع منتجات الألبان للأم اللي بترضع طبيعي أو الألبان الخاصة بحساسية الألبان للطفل اللي بيرضع صناعي

و مش بنجرب ندخل أي منتجات ألبان قبل ما يكمل الطفل سنة .

الأمل في حساسية الألبان أنها حساسية مش بتفضل طول العمر و دراسات بتقول أن عند عمر من سنتين ل ٥ سنين بيرجع الطفل طبيعي و يقدر يأكل أي منتجات ألبان بصورة طبيعية .

في نصيحة مهمة  :

في حالة المنع ، لازم نعوض الأم و الطفل بالكالسيوم . 

المعلومات قهنا إرشادية ، و أي نظام علاجي أو غذائي لازم يحدده الطبيب الخاص بالطفل .

الموضوع هدفه التوعية بحساسية الألبان عشان نقلل من نسبة التشخيص الخاطيء المبالغ فيه ،  وفي نفس الوقت نتطمن أن حتى لو الطفل مصاب بيها هيجي الوقت اللي هيشفى منها .

اتمنى ليكم حياة سعيدة

حساسية الألبان - الجزء الأول

حساسية الألبان

في البداية لازم نعرف أن أعراض حساسية الألبان كتيرة و متداخلة مع أعراض لأمراض تانية .

قرار إننا نشخص طفل إن عنده حساسية ألبان مش سهل ، لأننا هنضطر نحرمه من عناصر غذائية ضرورية موجودة في الأكل الممنوع

و بالتالي عشان نقول أن الطفل عنده حساسية ألبان لازم يكون الطفل تم فحصه كويس جداً من طبيب الأطفال و الطبيب المتخصص في أمراض الحساسية و نكون عملنا الفحوصات المطلوبة و التزمنا بالنظام الغذائي بدقة .

يعني أيه حساسية الألبان ؟!

حساسية الألبان المقصود بيها حساسية الطفل للبروتين الموجود في اللبن البقري و منتجاته ، يعني البروتين لما بيدخل جسم الطفل  ، مناعة الطفل بتهاجمه و بتظهر أعراض الحساسية ، و الأعراض دي ممكن تكون :

 أعراض بتحصل بسرعة، زي: حساسية شديدة بالجلد ، تورم الشفتين ، ضيق في التنفس ، رشح شديد ، قيء شديد مستمر ..

أعراض ممكن تظهر بعد أيام أو اسابيع ، زي : حساسية متوسطة بالجلد ، ظهور دم واضح أو خفي بالبراز ، أنيميا نقص الحديد ، إرتجاع بالمريء ، أسهال أو امساك

في بعض التحاليل ممكن الطبيب يطلبها زي اننا نقيس نسبة الأجسام المضادة من نوع (IgE)الخاصة ببروتين اللبن البقري في الدم

صورد دم كاملة بنعرف بيها وجود أنيميا

تحليل براز عشان نشوف وجود دم خفيف

معظم التحاليل دي بتقربنا للتشخيص لكن ما نقدرش نقول أننا ممكن نشخص منها بنسبة ١٠٠٪

طب أيه اللي يوصلنا للتشخيص و بنعتمد عليه ؟!

ده هنعرفه في الجزء التاني من الموضوع

الصفرا في حديثي الولادة - neonatal jaundice - الجزء الثاني

الصفرا نتيجة نقص الرضاعة breast fed jaundice :

 ودي بتحصل نتيجة أن الطفل ما بيرضعش بالصورة الكافية و بيتعرض للجفاف فبتزيد نسبة الصفرا

الصفرا نتيجة لبن الأم breast milk jaundice :

و دي بتحصل في بعض المواليد اللي بيرضعوا طبيعي نتيجة مركبات معينة في لبن الأم بتزود نسبة الصفرا و غالبا بتقل النسبة مع الرضاعة بصورة كافية و إضافة لبن صناعي في عدد من الرضعات  .

إيه علاج الصفرا ؟!

أول ما تلاحظ الأم الصفرا في الطفل لازم تروح بيه لطبيب الأطفال و قياس نسبة الصفرا بجهاز قياس الصفرا عن طريق الجلد أو أكثر دقة ، قياس نسبة الصفرا في الدم

بعد ما الطبيب بيعرف نسبة الصفرا بيقارن النسبة بمنحنيات بيانية و أرقام معينة بتتوقف على العمر الرحمي و التاريخ الطبي للمولود

بيقدر يحدد الطبيب هل نسبة الصفرا بتحتاج علاج ضوئي فقط أو علاج ضوئي و علاج وريدي بأجسام مضادة أو تغيير للدم لو اقتضي الأمر . 

التحاليل المطلوبة : نسبة الصفرا الكلية و المباشرة و الغير مباشرة total , direct and indirect bilirubin

في الصفرا التكسيرية،  طبيب الأطفال هيطلب تحاليل زي صورة دم كاملة و فصيلة دم  الأم و المولود ، خلايا شبكية ( بتزيد في حالة التكسير)

طالما الطبيب قرر إن المولود محتاج علاج  ، العلاج هيكون في رعاية حديثي الولادة ، مش في البيت.

العلاجي الضوئي للصفرا مش بيتم بضوء المنزل الأبيض العادي ، لكن بيتم بضوء خاص بأطوال موجية معينة بتحول الصفرا لمركبات سهل التخلص منها.

أكياس الأجار و غيرها من العلاجات مش مثبتة في دراسات موثوقة ، الأحسن نتبع طريقة العلاج المخصصة من طبيب الأطفال فقط.

.

اللبن الصناعي يوصف فقط لو طبيب الأطفال شايف أن الطفل محتاجه .

 الرضاعة الطبيعية مهمة جدا ولو الطفل بيرضع بصورة منتظمة و كافية نسبة الصفرا مش بتزيد عنده  ، ولو الأم اتبعت طرق الرضاعة الطبيعية بصورة صحيحة هتقدر تنتج كميات كافية للمولود.

لو تم علاج الصفرا بدري مش بتمثل أي خطر و المولود هيبقى معافي و سليم :)

دمتم و أولادكم في صحة :)

الصفرا في حديثي الولادة - neonatal jaundice - الجزء الأول

الصفرا - jaundice

ارتفاع نسبة (الصفرا) في الدم من الأعراض الشائعة جدا عند حديثي الولادة و بيحصل
فيها ان مركب البيليروبين
bilirubin
 بيرتفع تركيزه في الدم و نتيجة لتركيزه العالي بيظهر اللون الأصفر في الجلد و الأغشية المخاطية و كل ما زادت النسبة ، كل ما اتدرج اللون من الأصفر إلى البرتقالي ، و ممكن الأخضر و ده في حالة ارتفاع نسبة البيليروبين المباشر في الدم زي أمراض الكبد و القنوات المرارية .

ازاي البيليروبين بيتكون ؟!

البيليروبين هو مركب نهائي لعملية تكسير الهيموجلوبين

أسباب ارتفاع نسبة الصفرا متعددة ، اللي يهمنا اننا نعرف الأنواع المشهورة زي :

الصفرا الفسيولوجية physiological jaundice

و دي نتيجة عوامل كتير من أهمها أن الكبد في الرضيع بيبقى غير ناضج بالشكل اللي يسمحله يقدر يحول الصفرا لمركبات سهل التخلص منها بالإضافة إن الطفل حديث الولادة بيبقى نسبة الهيموجلوبين و عدد كرات الدم الحمراء كبير فبيحصل تكسير

 لعدد منها و دا بينتج
bilirubin
. و دي  بتظهر من اليوم الثالث للولادة و النسبة بتقل في خلال أسبوع

الصفرا التكسيرية hemolytic jaundice :

دي بتحصل نتيجة تكسير كرات الدم الحمراء بصورة كبيرة و بسرعة فبتزيد نسبة الصفرا و سبب التكسير الزيادة اختلاف عامل ريسس، اختلاف فصائل الدم بين الأم و المولود يعنى مثلا الأم فصيلتها o -ve و المولود A+ve في الحالة دي أثناء الولادة لو حصل إن جزء من دم المولود وصل لدم الأم ، دم الأم بيكون أجسام مضادة بتهاجم كرات الدم الحمراء للطفل و تكسرها .

Baby colics !

baby colic

First of all we have to exclude (surgical causes ) which mean causes that need urgent surgical interventions,  eg : ( intestinal obstruction , congenital anomalies of gut ) .

 in these cases there are some red signs that we must take care of them as : ( bloody diarrhea or bloody tinged mucus per rectum , rigid tender abdomen , severe vomiting , severe distension , pallor , continuous crying  or weak crying in severe cases)

if these signs are present , you have to go to the nearest ER !

after we exclude surgical causes , and colics are intermittent and baby is increasing in weight , suckling well

then

Do not worry , the baby is safe !

colics are very common and most of them are idiopathic with no obvious cause !!

some other causes are :

formula feeding , because most of formula milks are cow milk based , some of there substances when fermented by gut Flora , produce gases which cause distension and colic .

in breast fed babies , poor latch on and crying cause introduction of large amount of air bubbles with milk , which in turn cause gases , distension and colics

most of substances of mother's food , are secreted in milk eg:( garlic , onions , spices , coffee , ..)

and they cause distension and colics !

so how we can relieve our babies !!

medical ttt is helpful in some case , but fortunately in most of cases simple tips are helpful and effective .

* put your baby on your shoulder and do gentle pushes on there back from downwards upwards .

or

* put them on their backs and bicycling their legs towards their abdomen , gently

or

* put them on their belly on your lap and do gentle pushes on their backs ( make sure that their faces are not facing lap or floor and that they are breathing easily )

in first 6 months of life , breast milk or formula ( when needed)

no herbs or other fluids are allowed ..

Try these simple tips , and you will see how effective they are !

have a nice day ! :)

مغص البطن في الاطفال - Baby colics

مغص الأطفال


خاصة  عند الأطفال حديثي الولادة من أكتر الأعراض المتعبة للأم قبل الرضيع  واللي لازم نبقى فاهمين سببه عشان نقدر نتعامل معاه صح من غير مبالغة أو إهمال . 

أول و أهم تصرف نعمله  لازم نستبعد وجود سبب جراحي

 دا حالة خطيرة لو أعراضها موجودة لازم نتوجه بالطفل لطورايء أقرب مستشفى فورًا  و ( زي (انسداد الأمعاء   

الأعراض ممكن تيجي في صورة : قيء شديد جدًا ، ظهور دم مع مخاط في البراز ، انتفاخ شديد في البطن ، علامات الأعياء الشديد ، بكاء شديد مستمر ، تحجر البطن 

كل العلامات دي معناها ان في مشكلة أكبر من المغص والحل اننا أول ما نلاحظها نتوجه للمستشفى . 

خلاص استبعدنا وجود سبب جراحي

 ، والمغص عبارة عن نوبات متفرقة ما بتستغرقش وقت كتير ، مفيش قيء ، و الطفل بيرضع كويس و وزنه بيزيد 

كدة نتطمن إن المغص عرض طبيعي و شائع جدًا ،  و أسبابه كتير 

المفارقة في المغص أن نسبة كبيرة من الحالات مش معروف سبب محدد ليها ، يعني ممكن نعتبره صديق مشاكس للطفل 

في أسباب تانية متفرقة زي  :

 اللبن الصناعي و لأنه مصنوع من اللبن البقري فبيبقى فيه شوية مكونات صعبة الهضم و نتيجة التخمر في معدة و أمعاء الطفل بينتج كميات كبيرة من الغازات اللي بتسبب المغص 

لو الطفل بيرضع طبيعي ، معظم الأكل اللي بتأكله الأم بيتم إفراز مكونات منه داخل اللبن و بالتالي لو كانت الأم بتأكل أكل بيحتوي مثلاً كميات من البصل أو الثوم أو الفلفل الحار ، مكونات منها تنزل للطفل في اللبن و تسبب الغازات والمغص 

بكاء الطفل و الوضعيات الخاطئة للرضاعة (و دي نتكلم عنها بعدين) بيدخل كميات من الهواء مع الرضاعة وبالتالي الغازات والمغص 

الحل أيه ؟

أهم و أحسن حل هو إننا  نتطمن ! 

لأن الحلول بسيطة و غالبا مش هنحتاج علاج دوائي إلا لو المغص مستمر وفي كذا نوع من الأدوية تقدر الأم تستشير الطبيب عشان يحدد نوع مناسب 

كذا تمرين بسيط نقدر بيها نقلل الغازات و المغص 

اثناء الرضاعة و بعدها الأم تشيل الطفل على كتفها و تخبط برفق على ضهره كذا مرة  و دي أكتر طريقة فعالة 

أو 

إن الطفل ينام على ضهره و نبدأ نقرب رجله الاتنين ناحية بطنه بالتبادل و الضغط برفق بصورة دائرية من الجنب اليمين لبطنه للجنب الشمال و دا بيسهل خروج الغازات 

أو 

إن الطفل ينام على بطنه و راسه مرفوعة ونتطمن إنه بيتنفس بصورة طبيعية و نخبط على ضهره برفق 

الحلول دي رغم بساطتها بس فعالة جدًا و بنلاقي بعدها تحسن ملحوظ و راحة الطفل . 

خلوا بالكوا الطفل حديث الولادة في أول 6 شهور من عمره مش مسموح نديله أعشاب أو أي مشروبات غير الرضاعة الطبيعية أو اللبن الصناعي ( 

في حالة الاحتياج ليه )

جربوا التمارين و هتشوفوا الفرق !              

Our vision -الهدف

في البداية ، أنا طبيب أطفال و حديثي الولادة .. 

هدفي من المدونة أوصل المعلومة الطبية بصورة سهلة و واضحة للأم و الأسرة من غير الدخول 

في مصطلحات طبية معقدة أو وصف أدوية 

لكن .. 

شرح مبسط للأمراض و الأعراض الشائعة و نعرف إمتى نتطمن و نتعامل مع العرض في البيت ، و امتى نروح للطبيب . 

نعرف نفرق بين العادي و الطبيعي و بين الخطر اللي يستلزم اننا نروح المستشفى 

مع نصايح مهمة و مفيدة في تغذية الطفل 

وصف الدواء و الفحص لازم يتم بواسطة طبيب الأطفال 

 :)  اتمنى ليكوا و لأولادكم حياة سعيدة و صحة سليمة 

our aim is to provide a simplified database for the most common pediatrics disorders 

and signs 

simplified informations and tips to know how to differntiate between what is dangerous and necessitate urgent visit to ER 

and what is normal and common 

clinical examination and prescribing medication must be done by a qualified pediatrician

Have a healthy happy life ! :)